ليه لسلامتك لازم توقف التسويق عن طريق الواتس آب ؟
__
الواتساب اب تطبيق دردشة تم تاسيسه ونشره عام 2009 من قبل اثنان من مهندسي البرمجيات Jan Koum و Brian Acton واستمر تطويره حتى استحوذت عليه شركة meta المالكة للفيس بوك والانستقرام عام 2014.
بداية اطلاقه كان عبارة عن تطبيق يتيح حالة الشخص “مشغول” او ” نائم او ” في العمل “
ثم تطور لتطبيق مراسلة يتيح لك التواصل مع افراد عائلتك كتابيا ثم تم أضافه تسجيل صوتي وبعد ذلك اضيفت مكالمات صوتية وفديو ومؤخرا تم إضافة قنوات وقصص في الحالة (ستوري) .
بعد استحواذ شركة meta عليه بدأت التركيز على تحقيق الدخل والاستفادة منه في المجال التجاري والشركات .
وتم اطلاق واتساب بزنسس عام 2017
حيث توفر عدة مزايا لاصحاب المشاريع والشركات
مثل الرد الالي و والدفع وربط المتاجر واهم ميزة هي الإعلان والتسويق من خلال الرسائل المباشرة والجماعية .
وهنا مؤسسين التطبيق الأساسيين عارضو توجه ميتا في الواتساب والتركيز على تحقيق دخل من التطبيق بأي طريقة وبشكل اكثر ضغطا وعدوانية .
لكن للأسف فقدو التحكم على تطبيقهم بعد بيعه ومابيدهم أي شي ينقذون فيه فكرتهم .
بكل بساطة مبدأهم كان انه ما يفضلون ان تطبيقهم يتحول منصة إعلانات زي كل المنصات الان
تم التركيز على راحة المستخدم قبل أي شي وهذا هو نقاشنا في هذي المقالة
راحة المستخدم
تم تأسيس الواتساب والتركيز على سهولة الواجهه وسهولة الاستخدام
وتقريب الناس وتواصلهم مع بعضهم البعض بأسرع وقت واوفر طريقة
حيث كان الناس قبل واتساب يستخدمون الرسايل النصية المكلفة ماديا سواء محليا او دوليا .
وقبلها كان مواقع تستلزم اسم مستخدم وكلمة مرور وليس رقم هاتف ثابت .
حيث المفروض او هذا ماكان عليه التطبيق لسنوات عديدة
تطبيق حنون ومساحة آمنة هادئة وسلسة وسريعة ومجانية
مكان مليان ذكريات وضحك ودردشات مع العائلة والاقارب
عزايم ومرات هوشات قروبات دراسة وقروبات مشاريع
صور حفلات وصور شخصية والكثير جدا جدا
مكان خاص للشخص
يتعكر مزاجه لو احد بالغلط إضافة وهو مايعرفه ويجلس يمكن دقايق او ساعات يتساءل
من وين جاب رقمي ؟ ومين هو ؟ وياكله تفكيره
يبي مساحة شخصية له وللناس الي يعزون عليه واولوياته المهمة جدا .
لكن مع واتساب بزنسس تغيرت المساءلة تماما
ثق عزيزي صاحب البراند وصاحب الشركة .
انه نعم ممكن الطريقة رخيصة مقابل وصول هائل لزبائن كثير
وممكن عدد فتح الرسالة الترويجية عالي جدا لدرجة 99% من الي تم الارسال لهم فتحوها وقراءوها وشاف
اسم براندك واللوقو والرسالة والعروض .
لكن مع شي مجاني بيجيك بظهر الغيب وهو بلوك وسب وإبلاغ.
اخر جولة تنظيف بالواتس اب حقي تقريبا حذفت ما يقارب 40 اعلان ترويجي من مختلف البراندات .
هذا غير 20 رسالة أخرى عبارة عن اكواد تحقق.
كل الي يوصلني هي براندات او محلات انا شخصيا شريت منها ومن هالطريقة أصلا جابو رقمي
يعني شريت ؟ أي نعم
يعني احبها واعرفها واحرص اشوف جديدها ؟ أي نعم
لكن مع رسالة الواتساب والازعاج هذا كرهتها ونفرت منها
وهذا مو بس حالي هذا حال الكثيرين جدا .
الواتساب اعزائي مو مكان عروض وترويج هو مساحة خاصة جدا للشخص ومهمة .
صدقني الخيال الي يقنعونك فيه انه العميل بيشوف الرسالة وينبهر ويدخل متجرك يطلب ويدعي الحمد لله مافاتني العرض
هذي غير حقيقة .
لان راحة المستخدم ما تتحقق بطريقة الترويج هذي ابدا مهما حاولو اقناعك
أولا ممكن تكون رسالة الترويج ازعجتني وتم حظر رقم الواتساب للبراند .
لكن أيضا هالرقم هو خدمة العملاء بضطر ارفع الحظر مرة أخرى عشان اتواصل معهم بخصوص مشكلة
او حتى اعطي تقيمي ومراجعتي ومدحي للمنتج او الخدمة ؟
او حتى ببعض متاجر العبايات اعطي ملاحظات وتعديلات
وبحالات أخرى يصير تواصل ودي دافئ بيني وبين صاحبة البزنس وحوارات ونقاشات لطيفة
سيء جدا تخرب وتتعكر بسبة رسائل ترويجية مزعجة .
كم شخص كان ينتظر رسالة مهمة ويعد الدقايق والثواني ويجيه اشعار … يفز قلبه … يطلع اعلان وترويج ؟
كم شخص ينتظر رسالة عزيز او حتى لحظات حرجة واطمئنان على احد .. ويطلع بالنهايه شعار رسالة ترويج ؟
تابعت اخر التحديثات واكتشفت تم إضافة خاصية إيقاف الرسائل الترويجية من أي جهة ترسل لك
لكن المزعج هنا انك لازم تدخلها رسالة رسالة وتلغيها .
انا متاكدة ان البراندات ادركت كمية الناس الي الغت وصول رسائل ترويجية .
لذلك
لكرامة براندك ومشروعك لا تستخدم الواتساب للترويج ابدا .
فيه مليار طريقة أخرى افضل واحسن بكثير من اقتحام مكان خاص للناس وازعاجهم فيه .
طيب ماهي البدائل ؟
اذا كنت مصر على استخدام الواتس اب
استخدم الحاله (الستوري) للعروض والاعلانات وجديد تجارتك احسن واروق واكثر احترافية
او مثلا قروب تيليقرام للمهتمين او الانستقرام أضاف خاصية القروب
ممكن تخليهم عروض خاصة لهم .
ختاما راحة الزبون مع براندك اهم من مليون اعلان .
اختيار المنصة المناسبه للإعلان ضرورة .